Um dia os palhaços bascos Porrotx, Pirritx e Marimotots ouvirom falar da Semente e…., sem pensa-lo mais, decidirom vir visitar a nossa escola. Ei, vamos para aí! E assi foi: vinherom passar com nós uns dias, conhecer o nosso país e a nossa língua e cantar com nós a sua cançom mais conhecida e cheia de cores: Maite Zaitut, na versiom galega: Quero-te Mais, interpretada polo Sonoro Maxín. Maravilhoso!
Pirritx, que tem duas crianças de três aninhos, desta volta nom puido achegar-se à Galiza mas Porrotx, Marimotots, Txapas e umha equipa de once persoas mais, incluíndo o sociolingüista Txerra Rodríguez, a mestra de Ikastola Eider Palmou, e os txalapartaris Josu Gaintza e Urtzi Ugalde , si.
Toda umha expediçom chegada de Euskal Herria para passar com nós uns dias inesquecíveis.
O sábado pola manhá, já mui cedo, começamos a gravar umha reportagem sobre Galiza, a nossa língua e a Semente com Porrotx, Marimotots e Txapas e o seu acordeom. Umha família da Semente fixo de guia e explicou-lhes várias cousinhas…
Como quem forom Maruxa e Corália e como os seus vestidos de cores se enfrontarom ao gris dumha das piores épocas do nosso país… Ali receberom umha emocionante homenagem!
Explicamos-lhes tamém a importáncia de termos umha poeta como Rosalia, recitamos alguns versos e bailamos o merengue Rosalia quando Porrotx e Marimo gavearom pola estátua da alameda, dar-lhe um beijo à poeta de Padrom, uns picam e outros nom!
Explicamos-lhes tamém que temos umha língua própria que aqui na Galiza falamos muita gente e mais aínda polo mundo adiante, em países como Brasil, Portugal, Angola ou Timor Leste… E que aínda que hà crianças que, sobre todo nas cidades, nom falam galego, na Semente vivemos em galego, na horta, quando visitamos o bairro, quando trabalhamos com os contos ou as letras!
O sábado à tarde Porrotx e Marimotots participarom nas Jornadas de Educaçom Infantil organizadas pola Semente e a Asociación de Técnicas de Educación Infantil. Foi espetacular! Porrotx começou fazendo algumhas das suas melhores palhasadas e, quando tirou o nariz, converteu-se em Joxe Mari Agirretxe para transmitir na sua conferéncia algumhas claves do éxito do projeto Irrien Lagunak e a cooperativa Katxiporreta. Falou de educaçom em valores, de perseguir e compartir a alegria e da importáncia de que um povo trabalhe coletivamente para conseguir a hegemonia para, entre outras cousas, transmitir, atualizar e criar o imaginário infantil. Mui interessante quando explicou que eles sentem que formam parte do movimento social de Euskal Herria.
Aqui arriba está Porrotx, cambiando um pouco o mundo…
E aí, Txerra Rodríguez e Eider Palmou, falando sobre ikastolas e desenvolvimento do euskera.
Domingo, concerto com o Sonoro Maxin!!! Festa rachada, entre aturuxos e irritxis! Manolo Maseda, gente do Sonoro Maxin, gente da Nave de Vidám, homes, mulheres e meninh@s que participastes, um abraço! Bem sabedes vós que o que ali vivimos foi algo mui importante, algo que levavamos e continuamos a levar por dentro… a energia coletiva do cámbio social. sssshhh
Aqui podemos olhar um vídeo alegre com o Sonoro Maxín em acçom, geniais!:
http://www.youtube.com/watch?v=_CVaBvtMzGc&sns=fb
Segunda feira, luns, Porrotx e companhia visitarom as crianças na Semente! E Usoa Zumeta fixo um obradoiro de serigrafia, Urtxi e Josu aprenderom-nos a tocar -um pouco- a txalaparta e Txapas, o acordeóm.
À tarde, continuamos a gravar o documentário para dar a conhecer Galiza às crianças bascas: Corrubedo, a pé do mar; dolmen de Axeitos, entre mouras; monte Curota, para reconhecer a costa a vista de paxaro, desde Vigo a Fisterra.
Subimos a um barco no Porto do Som cantar “Catro velhos marinheiros” e, finalmente, mergulhamo-nos no extraordinário solpor do castro de Baronha, entre os sons telúricos da txapalarta de Urtzi e Josu.
– Os nossos povos, Galiza e Euskal Herria, vimos de mui atrás no tempo e vamos mui adiante!
E terça feira chegamos ao Courel. Duas poténcias tinham que se encontrar: Porrotx e o Apalpador!
Aí arriba podedes olhar à bruxa que nos orientou para dar com o Apalpador, tam difícil de achar! De caminho, debaixo da chuva, mesmo regueifamos um pouco!
Mas ao final, num lugar remoto, demos com o carboeiro gigante do Courel, amigo do Olentzero basco. Ai, que momento! O Apalpador apalpando a barriginha de Porrotx e Marimo e entregando-lhe um montezinho de castanhas!
Tamém celebramos o aniversário de Porrotx oferecendo-lhe como presente umha camisola da nossa seleçom de futebo com o seu nome… “Porrotxinho” !
Sentitu, pentsatu, ekin! Sentir, pensar, atuar! Eis o lema destes palhasos que levam muitos anos a transformar a realidade basca compartindo sorrisos com os meninhos e meninhas, achegando-lhes o euskera e participando na socializaçom dumha forma de construír cultura e um proceso de criatividade coletiva que comparte muitas cousas com o projeto da Semente.
Um abraço a toda gente que fixo posível este achegamento entre Euskal Herria e Galiza, um encontro no maravilhoso mundo das cores com que estám feitos os nossos sonhos e, o que é mais importante, as nossas realidades.
Um abraço pensado, sentido e apertado para a gente de Euskal Herria!
Katxiporreta! Kórtxoli de montri! Adiante, moinantes!
Viva a Semente! Gora!
