A origem da Semente
As Escolas de Ensino Galego Semente som umha iniciativa social sem ánimo de lucro, impulsionada pola Gentalha do Pichel e que pretende conformar, junto com outros projetos semelhantes, as bases necessárias para a criaçom da Escola Nacional Galega.
Tomam o seu nome das Escolas de Ensino Galego criadas a começo do século XX polas Irmandades da Fala, e impulsionadas por Leandro Carré e Ángelo Casal.
Entendemos o idioma galego como parte indissolúvel da nossa cultura, da nossa história e do nosso futuro, e defendemos o seu carácter internacional; criando um espaço de interculturalidade formentará-se a importáncia do respeito á outras culturas que vivem no nosso país.
A nossa missom. O nosso propósito. O que somos
A Semente nasce para dar às crianças a possibilidade de estar no mundo sem renunciar à identidade. Para valorizar a diversidade desde o respeito pola cultura própria. Para demonstrar que todas as línguas e culturas importam, forem elas grandes ou pequenas. Que nom é preciso abandonar a materna para adquirir novas e diversas línguas.
A situaçom natural estratégica entre duas das grandes línguas do mundo situa-nos em posiçom privilegiada para incorporarmos o inglês ao ámbito escolar e assi, desde esse triángulo linguístico, aceder a umha quantidade enorme de conteúdos académicos, científicos e culturais que permitem às crianças grande autonomia no estudo, investigaçom e aprendizagem.
O multilinguismo das nossas crianças permite-lhes conhecer em primeira mao e sem intermediários outras experiências, outras vidas, outras histórias e problemáticas. E esse conhecimento através do contraste é essencial para construir o pensamento crítico que poderá ajudar a transformar a realidade.
A nossa visom. Os nossos sonhos
Somos umha escola sem ánimo de lucro, de pedagogia transformadora ao serviço dos interesses populares.
Pretendemos ajudar a que o modelo da Semente continue a implantar-se polo resto do território para criar pessoas respeitosas, críticas e multilíngues que podam aceder ao conhecimento da maneira mais autónoma possível e que conheçam diretamente como é e como funciona o mundo global em que vivemos.
Queremos ser, como comunidade educativa, parte ativa dumha sociedade diversa e em movimento e trabalhar com o resto de coletivos locais e internacionais pola justiça social no mundo ampliando as perspectivas sobre si mesmas e sobre o mundo ao seu redor.
Queremos obter o reconhecimento por parte da nossa comunidade como escola que procura a excelência educativa, que acolhe a diversidade, que promove o acesso às diferentes línguas do mundo e que trabalha desde e para o respeito às crianças.
A nossa filosofia e princípios
Na Escola internacional Semente ensinamos a respeitar as diferenças e acreditamos que um mundo diverso é um lugar melhor, estabelecendo comunicaçom e colaboraçons interculturais de forma consciente através das línguas veiculares da escola, nomeadamente do inglês. Apreciamos a nossa e as outras culturas e aprendemos desenvolvendo o pensamento crítico e a capacidade de resoluçom de problemas.
Somos um espaço de pedagogia transformadora que entende a escola como parte integrante da sociedade; pretende servir aos interesses populares garantindo um processo de ensino aprendizagem democrático e fazendo possível que as crianças sejam livres e críticas.
Somos um espaço de criatividade e inovaçom onde, através do pensamento criativo ou lateral som proporcionadas as ferramentas necessárias para o desenvolvimento das capacidades artísticas e a imaginaçom das crianças. Com o pensamento criativo as crianças observam as situaçons e os problemas de todos os ángulos possíveis podendo gerar, com criatividade e inovaçom, mais de umha resposta para resolverem diferentes questons.
Somos um espaço laico. A educaçom laica representa a liberdade de consciência e do direito humano, da toleráncia e da democracia. Umha escola livre de qualquer imposiçom, propaganda ou doutrinamento religioso.
Somos um espaço de coeducaçom. Um espaço de educaçom integral para as crianças com umha educaçom baseada na igualdade de género em todos os aspectos da vida. Um espaço nom patriarcal e sem machismo que favorece o caminho das nossas crianças para assumirem o controlo da suas próprias vidas.
Somos um espaço inserido na natureza em que as crianças percebem os valores ambientais da nossa terra mediante a interaçom com o ambiente, através das saídas, roteiros, uso da horta, etc.
Defendemos a liberdade responsável, o respeito e a autoregulaçom; a educadora ou educador confia plenamente na criança; respeita-a como pessoa respeitando também as suas emoçons, tentando proporcionar as ferramentas para elas solucionarem os seus conflitos por si mesmas. Tenta-se favorecer a plena consciência por parte da criança da sua liberdade, mas também da existência de uns limites básicos de respeito a outras pessoas e ao seu contexto.
Somos um espaço educativo interactivo onde a pessoa educadora é umha mediadora que acompanha a criança no seu processo de aprendizagem; a relaçom pedagógica consiste no provimento das condiçons em que educadora e criança podam colaborar para fazerem progredir essas trocas que favorecem o desenvolvimento integral dos pequenos e pequenas e a aprendizagem mútua.
A relaçom entre professorado e estudantes convive num mesmo plano de entendimento e respeito mútuo. É mediante o amor, a compreensom e a empatia que pais, maes e professorado melhor podem levar estes princípios à criança.
Somos um espaço abertos à comunidade, que se preocupa com a realidade do bairro e da vizinhança de Compostela, tratando-se portanto dumha educaçom ligada à realidade do povo.
